之後就係你成日講嘅拜金價值觀。你所講嘅拜金價值觀，係因為我屋企有錢過你屋企？你既然講到我屋企係有公司，咁我點解要你啲錢？我冇用過你嘅錢，我亦都買咗好多嘢俾你。試問你身上嘅Yeezy、dunklow、Dior耳環邊個買？衫褲鞋襪，甚至底褲我有啲咩冇送過俾你？我有冇同你計過？我都係聽到你周圍同人講我拜金之後先思考自己係咪真係一個「拜金女」。我地平時食飯，呢啲係邊個俾？你冇錢嘅時候邊個俾一部份錢你買電腦？你送過嘅禮物，我真係好珍惜，我好鍾意。我唔覺得一個真係拜金嘅女仔會同一個冇儲蓄嘅男仔一齊。另外，你話我上網睇名牌就係拜金，我唔理解點解上網睇下名牌，就算買都係用自己錢買，都係你所講嘅拜金。定係純粹你接受唔到我哋嘅家庭背景差異？最可笑嘅係，我第一次聽你講我拜金係因為你同我前男朋友嘅女朋友傾我嘅嘢。

畢業前都只係因為一啲瑣碎事而嗌交，尚算風平浪靜。但我地一齊升上大專之後，你讀嗰科入面有一個女仔係你同班同學，更加係中學個陣鍾意過嘅人，喺我哋啱啱一齊嘅時候我已經講過介意你同佢有太多相處，然後你承諾唔會同佢有太多接觸。但原來之後你地有影相，瞞住我一齊做project，呢啲我都已經好唔開心，因為我真係冇安全感，不過呢啲都唔算得係咩，只係好小事。再後尾你手機突然間有佢嘅自拍相出現，我問你點解，你竟然話同佢搶手機，之後睇佢手機見到佢嘅相，覺得好得意，所以airdrop咗俾你自己。嗯，你真係好愛我。

後來我地鬧交講分手，我不惜一切求你復合。我透過我啲同學先知，原來你地兩個係分手前就曖昧緊，你地一齊返學，你特登去買鞋同佢撞情侶鞋。最後你仲糾結要同我復合定係同另外一個女仔一齊。但我冇所謂，我個陣為咗同你一齊返我咩都可以應承你，你想我點都可以，呢啲你自己都知道。

之後，的確係「意外」大咗肚，不過係因為你唔肯帶套。直至而家，你都冇俾個一蚊去負責呢件事。上個月尾，我問你攞返做手術嘅錢，因為之前講咗一人一半，畢竟雙方都有責任。但我收到嘅回覆就係「0責任」、「你爽完咪算囉搞咁多嘢做咩」等等。最恐怖嘅係你話BB對我係完全冇影響，只係想要錢，唔係擔心自己身體，我嗰一刻先明白原來攞返你應承咗要負責任嘅錢都可以係拜金。手術對身心帶來嘅傷害唔係我多講，我唔係想係到博大家同情，我相信唔會有任何一個女仔想俾人知道呢啲「風光」事，但係身邊越嚟越多人知我有過BB，原來又係因為你周圍講。我到呢一刻都唔知點解要周圍講…唔知你冇咗個小朋友，你會唔會都有罪惡感？

另外，分手之後你鬧我話個BB係咪你嘅都唔知。試問我地24小時一齊訓覺、返工、食飯，所有嘢都係同你一齊做，嗰段時間我連朋友都冇見。點樣同其他人發生關係？呢啲你唔會唔知。為咗唔俾嗰10000可以講到咁，唔知邊個先係拜金呢？

點解我哋會分手？係因為你喺我屋企嘅公司幫手，你完全冇上進心，就係諗住喺嗰度有份工就算。而係我地同居之後，我一直覺得我地係可以一齊到最後，我唔理未來有幾辛苦。但係後來見到你積蓄同我積蓄嘅分別，我開始諗我地係咪真係有將來呢。定係一直咁樣渾渾噩噩，每個月萬零蚊然後洗曬佢咁樣過日子？而且你之前有提到你嘅生活理念係要享受人生，唔洗為未來準備咁多，呢一刻快樂就夠，應該及時行樂，我理解到呢種諗法，但係同我想要嘅真係天差地別。如果係因為我係咁同你講要一齊儲錢，然後你一直洗嘅情況下，我選擇咗放棄呢段關係，咁樣就令我係一個拜金嘅女仔？咁樣就係一個港女咩？

同埋我係同你分咗手過咗三個月先同你嘅best friend一齊，我係同你分手之後先同佢多咗相處。我冇出軌。

你話你之後嘅日子都唔好過。但係我諗我哋共同friend都睇到你多姿多彩嘅IG，成日去蘭桂坊玩又入咗camp，識咗好多女，溝咗好多女，都食咗唔少個。仲要特登俾我知，你過得一啲都唔好？

你話想追翻我，但係喺你追返我嘅同時你都追緊好多女仔，就連係我哋分手個段時間，你都周圍唱衰我。之前中學嘅同學，公司嘅同事，連可能一兩個禮拜先見一次嘅人都知道我哋嘅事，輿論一面倒，有你講冇我講。甚至係咁搵我屋企人，煩住佢哋。最後分手嘅時候，你鬧埋我屋企人連我屋企人都要唱衰？個陣你住緊邊個屋企？你「不計前嫌」，我都覺得你嘔心。一開始有理你，只係因為我心軟，後尾冷落你係因為我啲friend鬧醒咗我。你喺度維持呢段關係？一路食女，一路唱衰我，而家喺度扮深情？係咪只要我成為人人唾棄嘅人，你就會快樂？或者呢啲就係你人生嘅意義。

希望你會負返你應該負嘅責任，唔好覺得個BB你冇責任，請你以後都要帶住你曾經有個小生命嘅「罪惡感」。