男朋友好自豪話自己係白卡

[匿名]

一開始同男朋友一齊嗰時佢仲係好正常，到一齊半年之後佢開始講多好多心底話，佢同我講表面既佢好似好正常咁，其實佢內心係有個好邪惡嘅惡魔。佢會成日充滿負能量，會有啲好邪惡嘅思想，例如成日幻想隊冧邊個邊個⋯

起初聽完唔係覺得驚，係覺得佢有中二病，一嚟佢講嗰時個樣好自豪，二來佢其實係一個非常怕事嘅人（平時講嘢細細聲、剩係有排瘦咗啲都係咁諗自己會唔會有絕症、抽下血都會話好驚痛、去op好多機動遊戲都唔敢玩、睇鬼片會嚇到嗌）後來佢仲會同我講想自殺，雖然本身已經知佢有中二病加上唔太信佢會夠膽，但我都有叫佢你不如睇下醫生啦，佢又堅持自己冇病，仲同我講，愚蠢嘅人先會快樂，世間太多膚淺嘅人類，佢只係睇透哂依個世界⋯⋯

佢會成日同我講佢係一個白卡佬，一路講個樣仲好自豪，有次佢上司話咗佢幾句，佢返到屋企好嬲咁同我講「下次佢再話我我實郁佢」又會成日呻佢啲同事「我今次比面佢地先唔diu班人咋，下次佢地就冇咁好彩！」每次都係得個講字，但佢講嗰下好似覺得自己好型咁。試過有次同佢理論緊，佢走埋嚟勁近咁瞪大隻眼啤住我，我當下嚇一嚇騰後咗，佢即刻忍唔住喺到笑「嘿，你驚咗我？唔洗咁驚喎～都係望下你姐～」但其實佢永遠都只係做個勢出嚟，實質佢份人好要面，小小事都驚到pk。試過有次佢又扮白卡，我同佢講，一於send啲對話比你呀爸呀媽睇下囉，佢即刻答我：我啱先玩下咋你咪咁認真啦。

曾經都試過有個真係白卡嘅呀叔喺mk發癲亂鬧人，佢仲好似好仰慕咁，話respect佢真男人，咁樣先唔會比人恰到。有次嬲嬲地話咗佢一句你真係白卡㗎喎，佢聽完個樣勁開心咁話佢的確係，好似當咗句嘢係讚美咁，仲即刻擺個痴線樣出嚟配合⋯⋯我依家對住佢好無語⋯佢久唔久就對我發作一次，啱啱又聽佢講經，又話人類點點點⋯有時唔只影響到我，仲影響到佢自己，佢會沉輪喺個悲劇人生，會話所有故事嘅主角都係悲劇，有時出街會全程黑面，無啦啦喺到瞪盡隻眼扮邪笑，問佢咩事佢又答：嘿我白卡佬嚟，係咁無厘頭㗎啦～我都唔知點同佢溝通好，講乜佢都覺得係我（人類）太膚淺，我又冇理由咁直接同佢講你其實係咪有中二病，但我驚有日忍唔到口咁話佢⋯唔知仲有咩方法溝通，定等佢日後成熟啲就有改善呢

[匿名]

人人都話唔好陪一個男孩長大，你走去等一個白卡成熟🤔浪漫です🤔

[匿名]

中二病加白卡再加精神分裂 有冇得諗🤔

[匿名]

人生觀唔係咁容易改變，你發現唔夾最好分手

[匿名]

最好唔好分手，分手既話有排煩😂

[匿名]

如果你阻止唔到佢 可以試下加入佢

[匿名]

老老實實，佢邊一忽令你愛上佢😂😂我直頭覺得佢係米癡線😂

[匿名]

你男朋友係咪姓劉，叫馬車？

[匿名]

佢依家個情況都幾危下…
睇你咁講，佢無論思想定行為都比較極端，加上佢悲觀思想唔太控制得到，影響埋佢啲情緒
你都識講佢得個勢，雖然係其他人面前扮到好掂，但其實內心係好悲觀好脆弱
你可以睇穿依一切已經好叻，起碼留意到佢有咩問題。同時間你都可以多啲理解下佢嘅諗法，分享吓你嘅意見同感受，等佢唔好咁容易就沉咗落去
依啲嘢唔關成唔成熟事，你試下帶佢見專業人士，例如臨床心理學家/輔導員，了解下佢思想、情緒同行為背後嘅成因，咁先可以從根源幫到佢

[匿名]

佢呢一種情況應該係曾經有心理創傷,因為自己弱小又唔夠膽去為自己反擊,久而久之因為佢默認咗自己係不斷會被人傷害嘅情況,所以佢遇到被攻擊嘅事情亦都越嚟越多。(意思即係即使係一件好少嘅事都會覺得係人哋攻擊佢,因為佢一直處於受害者心理)因為呢啲創傷不斷累積,佢嘅潛意識其實係接受唔到呢種情況佢就唯有將自己扮演一個精神病患者,企圖合理化自己討厭嗰啲人並且想報復嘅心態。(因為佢理想中嘅自己係一個聖人,唔會做呢啲鬧人嘅嘢所以佢要畀一個理由自己) 但係因為現實嘅佢已經習慣咗成為受害者嘅模式(即係唔識得點樣去同人溝通所以永遠都覺得人哋係對佢唔好)亦都唔會夠膽去反抗,所以呢個就形成咗一個循環。 正因為佢每一次都唔夠膽去反擊所以佢就會覺得自己係受害者被受傷害然後又不斷幻想點樣去報復。 正確啲嚟講其實佢並非白卡,佢需要由佢嘅陰影走出嚟就要有一個人去話畀佢聽,你係可以反擊可以反抗嘅,亦都唔需要咁堅強,同埋要畀佢明白呢個世界冇聖人,每個人都有自己嘅性格同脾氣,唔需要咁顧及自己嘅形象。 呢類型嘅人要做佢嘅另一半你嘅包容心同埋耐性要非常強大先可以療癒到佢哋。所以樓主就應該要搵過另一個人。

[匿名]

見到標題笑撚咗

[匿名]

你咁都肯同佢一齊，你都離白卡不遠

Btw 0分重作

[匿名]

感覺佢本身膽小怕事又廢, 但又唔想比你知佢係咁, 所以咪講到自己幾惡幾看透世事. 如果你飛佢, 佢實好傷心挽留, 一係就話一早預左啦, 人性就係咁, 我都知乜乜乜.

[匿名]

點解要浪費時間係白卡佬身上？我係你父母真係會嬲，一齊好耐/結左婚之後先拎白卡就話啫，而家就好抽身離場啦，你唔夠白卡玩

[匿名]

好大機會係佢原生家庭對佢嘅影響而令佢有咁嘅表現，唔容易改變。而且佢睇事太極端同狹窄啦，點解睇穿個世界就唔可以開心呢？其實都係睇佢識唔識拎平衡 同埋可以由自身開始做改變啫。

[匿名]

好大機會係佢原生家庭對佢嘅影響而令佢有咁嘅表現，唔容易改變。而且佢睇事太極端同狹窄啦，點解睇穿個世界就唔可以開心呢？其實都係睇佢識唔識拎平衡 同埋可以由自身開始做改變啫。