養佢咁多年,佢話返我白食白住


  • 我22 男朋友23
    我仲係一個學生,男朋友中二之後夠15歲就冇再讀書,原因係俾人踢左出校

    當初一齊嘅時候男朋友已經係啲唔讀書嘅人,但係我就係鍾意佢。雖然我地分分合合左好多次,但係最後都一齊翻。自從佢15歲冇再讀書之後佢屋企冇再俾零用錢佢,冇鬧過佢,冇逼佢讀書或者翻工。有時候佢半夜冇屋企翻都會去我屋企留下搵我陪佢

    一直以嚟都係我養緊佢,正確嚟講係我屋企養緊佢。雖然我屋企人係好唔鍾意佢,屋企人都知我俾曬自己啲零用錢佢使,但係佢地都冇cut我零用,仲加左唔少(因為怕我冇餓親)

    直到我地一齊6年,男朋友想我搬去佢屋企,如果唔搬就話分手。我搬左去男朋友屋企住,我住左2年都係好唔慣,因為間屋真係好舊,啲牆又黑曬、啲窗掂一掂我都驚跌落街、廁所啲磚又爛曬、洗手盤都爛、廚房爐頭又壞、抽氣扇又壞、冷氣機又壞,就連門口個門鎖都壞(鎖唔到,其實好唔安全),但係佢地都唔肯換
    我一開始有話過我想分擔一半租金(公屋租都唔係好貴,$2000左右),同埋我話想出錢換過曬啲壞電器,但係佢屋企人唔同意都冇計。呢2年係我最難捱嘅日子,雖然唔使出錢,但係簡直係人間地獄

    平時屋企人weekend會接我一齊出街,男朋友就留係屋企,因為我屋企人唔想見到佢說唔約埋佢。我次次上到車,屋企人都話我好大浸味,又見到我係男朋友屋企都熱到出曬汗。屋企人成日都叫我翻屋企住,但係我唔想分手就拒絕左佢地。於是我屋企人唔忍心見我住得咁辛苦,佢地出錢俾我同男朋友租屋,只要我住得舒服就得

    但係我地搬左出去都成日鬧交

    佢成日都話係佢屋企住咪幾好,佢屋企人又對我好好,又唔使交租,食飯又唔使俾錢,佢地又冇鬧過我。其實我都想俾錢住好啲,其實我都唔想日日食大家樂,其實出去食好嘢嘅時候佢又唔會講係我請佢?🙂

    我地一齊住咁耐就日日都為左屋企人俾我嘅錢而鬧交

    你食嘅嘢係我俾、你著嘅係我俾、你住嘅係我俾、你連搭車都係我俾,所有節日嘅禮物我都會送齊曬。但係次次鬧交換嚟嘅係咩?
    佢成日都話:「啲錢都唔係你嘅,係你屋企咋」,但係仲要成日都話我屋企人衰,成日都話佢地對你唔好,咁你都要反醒自己點解我屋企人唔鍾意你先得架,書又唔讀,工又唔翻,搵得少唔緊要呀,但至少俾佢地睇到你有上進心

    我叫佢翻工又唔翻,家務又唔做,本身我一啲家務都唔識做,我都知係我問題。但係到宜家搬左出去住,我咩家務都識,又識通渠、識砌家俬、識修理水電(以前細個都有跟老豆學過少少,有時會再請教下老豆,所以宜家有漏水都係我整),到宜家我連開鎖都學埋(因為開始搬入去佢成日都唔記得帶鎖匙,又唔配鎖匙俾我,住左成個月先肯去配)

    我有同佢傾過各種問題,但係最後都係鬧交收場,跟住又開始話我白食白住佢屋企2年,我都唔知點傾落去

    男朋友仲要話我廢過佢,又話我媽寶,又話我畢業之後都係去屋企人間公司到做,咁努力做咩

    究竟媽寶嘅定義係咩?

    我已經為左你離開屋企,我只係同屋企人講兩句住得好辛苦就係媽寶?係,我冇錢啲確會問佢地拎,但如果唔係你大使我需要咁做?我已經係屋企人面前幫你講好說話,但係你都要行動俾佢地睇架。你成日都話我屋企人,我話翻你都好正常姐,我屋企人又唔係欠左你

    我淨係想好好咁行落去,想段關係平衡都咁難?


  • 唔分手等過年😢?


  • 咁係你戇居幫人養大個仔姐


  • 唔該你真係快d分手啦ching🥹點解要同垃圾一齊咁多年糟蹋自己,你唔好諗咩咁多年感情啦,你包養一個情人都冇依家咁難受啊真心


  • 佢思想幼稚、狹窄… 真係會有將來??
    你要好好珍惜屋企人咁錫你呀,佢滿口歪理.. 早日分手啦,唔健康嘅關係不如自己一個。要好好愛惜自己!


  • 點解仲要同個男既一齊🥲不如快啲分手


  • 建議樓主DM養我,
    最少我唔會鬧你。🔥
    你養都養得心甘命抵啲


  • 樓主可唔可以養埋我🥹


  • 就黎過年啦,求下你快D分手啦🙏🏻 you deserve better


  • 分手啦,啲人都唔識感恩,呢啲人仲同佢一齊做咩。衰啲講呢啲垃圾你同佢分完手就會發現世界好大,比佢好嘅人好多,你大把世界可以慢慢揀,而佢就真係無得揀都唔會有人揀佢。唔讀書唔緊要啊,但起碼要努力上進啊,但佢咩都唔係。再者你係同佢拍拖,唔係扶貧啊,佢一味係咁問你同你屋企人拎,但佢都無感恩過,佢有無諗過如果唔係你,你屋企人會唔會俾錢佢啊,又唔係同佢有親?


  • 你先得22歲,一齊6年、同居2年。
    即是你地16歲就一齊。

    估計佢係你初戀,所以你先咁執著、唔肯徹底分手。
    ——————————————————
    你知道嘛,佢身上最可恥既唔係學歷低、見識少,而係理所當然啃老呢一點。

    作為一個成年男性,佢洗屋企人錢完全冇任何內疚,自己連家用都冇比、仲好意思叫你去佢屋企住。

    旁觀者清,你屋企人一直都睇得好清楚,好肯定呢個人冇將來、先會咁反對你地。
    ——————————————————
    好簡單問你一句。
    你係咪打算打後幾十年同一個軟飯硬食、不知感恩、不求上進,仲要奚落你貶低你、覺得全世界都要就曬佢既人一齊?

    拍拖係為開心。
    我關心你、你關心我,共同努力創造一個穩定既生活。

    呢個人有冇長期令你好有安全感?
    呢個人有冇關心你既利益同感受?
    呢個人有冇為兩個人既將來努力?
    ——————————————————
    依家抽身,你仲有時間思考自己想要一個點樣既人生、有時間觀察真正靠得住既異性、有機會改變自己既命運。

    如果你再執迷不悟、荒廢多幾年,到時越挨近30歲、你更加進退兩難。

    如果真係搞成咁,只會傷害到真正愛你既人。


  • 唔介意嘅話養埋我屋企人,岀錢幫我屋企換曬電器傢俬佢,我唔會覺得你廢你唔好,我會感恩我會有上進心,點解我唔係男仔😢係女仔都想要你呢啲朋友


  • 明白你嘅感受同困擾😢
    佢已經有既定立場,就算你點苦口婆心同佢傾,作用都唔大
    佢咁自以為是同唔成熟嘅表現只會令你繼續難受同難堪
    你屋企人對你好好,表面上唔接受你男朋友,實際上已經接受咗佢嘅存在
    你倒不如霸氣啲,將你尾二個段原汁原味同佢講一次,如果佢繼續覺得自己啱曬,咁你要諗清楚到底佢係咪真係適合你,同埋應唔應該出現係你未來嘅計畫裏面


  • 我識自己去廁所,有冇興趣養多隻狗?講笑,分手啦等過年咩?


  • 先唔講你同你男朋友,你都識講你屋企人冇欠佢,咁佢大使你咪自己賺錢,係你自己選擇養佢。成件事入面最慘係你屋企人。你都明知你男朋友係咁話你屋企人,作為一個女,你唔分手唔屌7佢仲要攤大手板搵屋企人拎錢養佢?你都幾孝順


  • 簡單D一句,你係米傻架?話你蠢都不至於形容你,好好地一個女人仔為個甘即男人搞到自己甘,你仲諗住行落去係諗住養佢過世?為愛情挨唔係甘用架

  • 匿名

    即係咁… 其它嘢我唔講 但病我都可以講兩句 唔講研究 研究太死 我直系屋企人上幾代係無糖尿 但我有 但我嘅表XX舅公係有 而佢哋幾個小朋友都無 所以你「男朋友」有唔代表你哋小朋友一定會有🙂再講 如果佢係擔心嘅 應該一早同你講/唔做🙂不過… 盲目係一件好事嚟嘅

    閱讀更多

  • 匿名

    碼頭拒絕俾你靠岸

    閱讀更多

  • 匿名

    佢大你廿年 ,就當你20歲 即係佢都40歲啦,都唔緊要 因為年齡唔係問題
    但之前女朋友分手上屋企偷野所以屋企人會介意呢咁求9其既籍口都信🙂仲話落左bb會同你簽紙 呢類人可能落完人都唔見埋

    閱讀更多

  • 匿名

    係公司識,但係夜場返工,姐係個男人係夜場識,去夜場玩嘅男人,你想佢有幾真心?

    閱讀更多

  • 匿名

    其實唔駛諗咁多!佢真係乜都冇呃妳,連唔想同妳都冇呃妳。所以如果妳真係覺得要同對方結婚,佢唔屬於妳應該考慮嘅對象⋯⋯

    閱讀更多

  • 匿名

    講到屋企人未見你都已經好大機會唔鐘意你咁,你仲信佢落咗bb就真係會同你結婚?

    閱讀更多

  • 匿名

    比佢生!比佢生!

    閱讀更多

  • 匿名

    有冇諗過可能佢老婆帶仔女飛左去外國,佢負責留係香港揾錢,不過佢老婆set左cam係屋企,就係為左check佢有冇偷食,or覺得只要唔偷到返屋企就隻眼開隻眼閉,所以咪從來唔畀你上佢屋企

    閱讀更多

  • 匿名

    唔好害咗bb,同埋記住超渡嬰靈, 唔係講笑

    閱讀更多

  • 匿名

    唉⋯⋯一齊5 個月,對人完全唔了解,連人係咪有婦之夫都唔知⋯每個月比兩萬你就以為對你好😅,你的愛情係用兩萬來衡量ga 咩? 有d人可以ge, 但又係你話其實果兩萬對你來講係少,你自己一個月都唔只搵果個數⋯
    其實呢個情況,你覺唔覺得自己比人包呀?
    佢話比兩萬你開少d工/唔好返工,你覺得佢晚晚陪你啫,但外人睇似係佢用錢包你(外搭你對佢的感情分)你晚晚陪佢wo…
    答你問題,我當你廿歲啦,個男人大你二十年都40 歲啦⋯係正經人家、係負責的話又點會「太早、未準備好」呀? 仲要咁攪笑幫你評定埋「你自己都未準備好」😂
    半年來佢每晚同你出去玩,日日見面,所以你唔覺得佢係有老婆😂⋯你呃人定呃自己? 我淨係見到一個疑似有婦之夫,每晚扮OT 凌晨三點至返屋企,注意!佢係每晚都要返屋企!你又未上過佢屋企,佢講你又信?
    我覺得你冇咁蠢,始終做夜場ge女仔比人感覺都幾醒目,因為要識得保護自己,呢單野你擺明自己呃自己⋯
    其實我估你係咁,你宜家都心知個肚唔留得,但你亦心存僥倖,想搏一搏,搏佢並非有婦之夫,搏佢唔係連仔都生左兩名,諗住死纏多陣先,可能講多兩講、威脅多兩野,佢總會是但一瓣落搭,所以你對佢講「落仔都得,但要即刻結婚」,耐何佢連呢個offer都拒絕⋯
    佢識玩呀,熟成到佢咁ge男人,又出開來玩,你無啦啦冇食避孕藥有左點解要我埋單?都講左唔會要啦⋯你又用一係落仔一係結婚來講數,點會咁蠢比你講數到呀?重點係玩得果5 個月咋,就攪單咁ge野⋯死人都唔會承諾你d咩野,錢,可以比(少少)你,但玩到又大肚又結婚,會攪到佢一個有婦之夫好頭痕⋯
    其實你心知拉扯多一排,佢一定發老爛走人,咁就要睇你自己想唔來要個bb, 你能唔能夠單親,又或者你醒目,唔想冇左佢呢條水喉,去到呢步亦都估到佢老底,你自己解決件事,再扮無知咁拍多一陣拖⋯在佢身上拿得幾多得幾多⋯
    我覺得成件事就係咁lo…你可能覺得自己好慘,但其實最慘都係果個未能出世的bb…

    閱讀更多

  • 匿名

    咁你自己停左藥唔報仲好意思話人不負責任?
    其實你係咪想有心裝佢
    好似之前果單偷精造人成功迫條仔埋單?

    閱讀更多

  • 匿名

    宜家都唔同你結 點解會信落左之後會同你結😂

    閱讀更多

  • 匿名

    樓主好多野都好一廂情願渦。
    一齊左5個月就吾要自己份工 為佢賭上將來。
    仲要吾食藥 諗住佢會埋單
    但有冇諗過人地既生育計劃係點先。搞笑係連屋企都未上 家長都未見就要結婚生bb 🙃 樓主你都幾大膽渦。

    閱讀更多

  • 匿名

    男人有無老婆都好,但明顯唔想你做佢老婆

    閱讀更多

  • 匿名

    將包養講到咁清新脫俗都算少見。
    ·
    佢由始至終都好清晰自己既角色,反而你越位了。
    ·
    一個每隔一兩個星期就可以比1萬你做零用錢既人話自己養唔起小朋友,態度其實都唔算係暗示了。
    ·
    一個出黎買,一個出黎賣。
    你竟然同佢講將來講家庭講結婚?

    閱讀更多

  • 匿名

    今年6月係公司識左個大我差多二十年嘅男朋友。 佢好錫我 我哋差唔多日日見,佢會帶我周圍去食嘢去玩 時不時俾家用我(一或兩個星期一次 每次一萬)我知好多人會覺得奇怪點解佢無啦啦俾錢我🤔

    其實係因為我係返夜場,可以一日搵好多。為咗同佢一齊我寧願唔返 佢話補貼俾我 我平時都要洗費(但我通常都話唔要,但佢都會照俾),不過其實個度連半個月人工都唔知有冇。我講岀黎,唔係怪佢 亦從來冇咁樣諗,我只係想講我為佢賭上我嘅將來。因為呢一行係可以話靠青春食飯 我返呢行唔係貪錢 我從來都唔會買奢侈品名牌 (有嘅,我淨係兩年前生日買過一個袋俾自己)我只係想搵多啲錢將來可以唔使咁辛苦,可以買樓退休。

    佢知道我一直都有食開避孕藥 ,但係因為我懶咗食我疏忽 所以九月尾黎完m到而家成個月都冇嚟到 佢間唔中有問過我有冇食藥,我都會覺得好煩開頭都會串佢話做咩啊你好擔心呀唔想負責任?佢都會話咁如果有咗BB點算,佢就會話返我,話我都未準備好。但係我可以為佢準備好又知唔知呢?我想同佢組織一個家 想同佢行落去 簡簡單單咁生活。

    到咗前日佢叫我驗下係咪有咗,因為我太耐未嚟M 喺未驗之前 我問佢如果有咗點算 佢同我講話佢唔想要 未有打算 負擔唔起住 又話自己有糖尿病怕遺傳比BB 會害左個bb。話因為幫佢前度買樓 欠銀行好多錢起碼要還幾年(但最尾都撻訂咗),又話同我一齊之後銀行冇咗二十萬 (好似怪緊我,雖然佢話唔係)所以而家係入不敷支⋯⋯ 但其實我唔係要我嘅生活日日都五光十色,我係願意過住啲平淡嘅日子,煮定飯等佢放工返嚟。但係一齊咗差唔多五個月,我都未去過佢屋企 。我有問過佢點解 佢話因為佢之前有個女朋友分咗手上佢屋企偷嘢, 所以令到佢屋企人抗拒 佢係同佢屋企人住 但係層樓自己買 同埋佢屋企人見到我同佢年紀差距一定會好多說話。

    佢話如果我一早同佢講停咗藥 佢就會做安全措施 我話佢不負責任,佢問我想佢點樣付 我話唔要BB都得一係去簽結婚紙 但係佢連咁樣都拒絕(當然我有堅持話要生 佢話覺得我未成熟到可以應付 我太倔強 太早 驚佢個病遲早會喪失工作能力會影響我,咁樣令佢好大壓力)

    我問佢係咪同我玩玩下 ,淨係想有人陪 佢答我因為同我一齊 ,佢瞓覺打機嘅時間都少咗好多 點解我仲咁樣覺得 而且日日我話要去邊度去都會就我。又係嘅佢每晚都陪到我好夜 起碼凌晨三點先返屋企 但係其實佢要朝頭早七點要起身反工 而且日日洗費都多。佢話佢要玩 要人陪唔使咁樣 因為佢去夜場多數都係判頭埋單。其實我有諗過佢會唔會係有老婆會唔會有第二個但係呢五個月佢日日收工都即刻搵我 陪到我凌晨先返屋企 有老婆嘅,應該唔可以咁樣做。

    佢話應承我係我唔要佢之前佢唔會唔要我 想同我行落去 ,但唔想比呢啲嘢綁住覺得太早太快 或者等如幾年後大家再了解先。但係我認定左係佢真係好想同佢結婚 我未試過咁想同一個男人生
    我唔知,佢係真係有困難定係唔想對我負責唔夠愛我?但係佢為咗我犧牲左打機瞓覺嘅時間同埋錢 而且我感覺佢都好似好愛我 希望各位大神可以比到意見我

    閱讀更多

  • 匿名

    有冇可能係你自己敏感得滯🥲
    咁落去遲早逼走你男朋友

    閱讀更多

  • 匿名

    俾個❤️❤️你

    閱讀更多

  • 匿名

    不如搵下自己無安全感個源頭係邊先,得你先幫到你自己改變ahh!

    閱讀更多

  • 匿名

    我男朋友會sd比佢兄弟🤣🤣🤣

    閱讀更多

  • 16
  • 16
  • 16
  • 16
  • 15
  • 16
  • 16
  • 16
Copyright © 2023 elahk.com. All Rights Reserved.
Sponsored by facialhk.com