佢一句唔鐘意我就要送走個仔

[匿名]

我係一個單親爸爸，有一個讀小學嘅小朋友，我同佢媽咪分開左八年，除左有關小朋友嘅事之外，我哋唔會聯絡亦唔會見面，當初分開時小朋友跟佢，但我父母念在小朋友仲細，都會幫手湊下，小朋友放假時會喺我屋企住，我父母會幫手湊。

而我女朋友一齊左四年，開頭相處都無問題，佢亦知道我有小朋友，小朋友亦幾鐘意我女朋友，而小朋友嘅媽咪，因為當初同我一齊時做過啲好過份嘅事，亦都係我哋當初分手嘅導火線，而我女朋友知道佢所作所為後好討厭佢。

近一年，女朋友開始唔鐘意小朋友成日喺我屋企，我有解釋過，佢媽咪係佢放假時翻工，搵翻自己同小朋友生活費，我同阿爸關係好一般，佢寧願趕我出門口都會幫手湊小朋友。我亦同佢媽咪講過，但佢媽咪話搵唔到人幫手湊先搵我阿爸幫手，，而小朋友過嚟時係佢媽咪直接同我父母聯絡，所以決定權根本唔喺我手，有時甚至我返到屋企先知道小朋友過咗嚟。

近呢一年，女朋友比我嘅壓力越來越大，其實我都明白佢，有邊個女仔會想見到男朋友同佢前度生嘅小朋友喺屋企，但我哋收工唔高，如果想搬出去係好勉強，有時候平日學校放假撞正佢過嚟瞓，小朋友又喺度嘅話，佢都會發脾氣，覺得點解佢阿媽又要將個小朋友塞去我屋企，但正如我上面所講，我根本冇選擇嘅權利。

問心一句我平時嘅生活係側重女朋友多啲，只係佢唔喺到時先會陪下小朋友，其實我唔介意小朋友喺度，但係我女朋友唔接受呢一個平衡。

佢覺得係佢媽咪特登放個小朋友喺度示威，咁但的確係學校放假時小朋友先會過嚟，而因為女朋友平時放假先過嚟，但係學校嘅假期同佢嘅假期都一樣，甚至更多，所以形成咗一個佢每次過嚟都會見到小朋友喺度嘅錯覺，覺得點解佢要就埋我前度俾個小朋友喺到，點解每次嚟嘅時候都見到小朋友，我點解釋佢都聽唔入耳。甚至有一次我直程要搵朋友屋企幫手照顧小朋友一晚，個心其實都好唔舒服。

手心係肉，手背又係肉，到底我可以點做？

[匿名]

你估湊仔輕鬆？你父母都係錫你先幫你湊仔，你個仔係你生嘅，你都可以講到老幼都唔關你事咁，好野👏🏻唔該你做得老豆就負上自己要盡嘅責任，就算你幾憎你前妻，個小朋友都係無辜的，唔該你唔好有異性冇人性

[匿名]

你嘅仔係一世嘅，但女朋友可以換。。佢依家都已經接受唔到你同前妻嘅小朋友，無可能視為己出，假設你以後同佢結婚又生多件，佢一定一腳踢開你同前妻嘅細路，到時真係爸爸唔好唔要我

[匿名]

一齊時已知對方有小朋友
自己接受
有咩好投訴

[匿名]

上你屋企但係介意有其他屋企人係度
你條女搞清楚庄閒未？
有能力就搬出去 而唔係上’人地‘屋企係度呱呱嘈
自已個仔講到事不關已咁
我明點解你老豆老母趕你走都要攬個孫了 其實真係應該射你落牆
咁個問題就解決咗

[匿名]

換女朋友啦⋯
爸爸係有責任照顧小朋友，陪伴佢成長。媽媽都係去返工啫，又唔係去玩。

[匿名]

如果你個仔係係地分開之後 係跟媽媽既話。而你父母係純粹幫手。而你前度成日要你父母幫手湊小朋友 甘其實係老馮左？

如果你想尊重返現任。你就同返你前度傾下 你個仔要你父母湊既次數 一個月幾多次。
始終你個仔係跟佢生活。盡量避免返你現任好似成日見到佢係到甘。

一係你就去你現任屋企囉。叫佢吾好上你到。不過治標吾治本。

不過你要令你女朋友明白。雖然你地分開左 你前度做錯事 但小朋友係無辜 你都吾好講到自己太冇責任感。始終你係爸爸。

[匿名]

女人都有與生俱來既母性，又容易心軟。
·
你可以教小朋友氹下你女朋友、令佢都不自覺代入父母既角色。
———————————————
不過請你記得你係一個爸爸，呢個係已定既事實。
·
如果用盡一切手段，你女朋友都係唔能夠接納小朋友既存在，繼續行落去只係浪費彼此既時間。

[匿名]

梗係顧咗小朋友先啦 生得出唔使負責？ 女有得溝過 你個仔有無得揀第二個做老豆？

[匿名]

你女朋友同你一齊之前就應該要考慮呢啲長遠既問題，既然佢接受唔到就唔應該揀你，完🫠

[匿名]

乜野其實我唔介意小朋友係到，個小朋友你都有份，你本身都有責任照顧。你應該係有能力時幫手照顧佢，而唔係唔介意佢喺到。所以，你應該清楚話俾你女朋友聽，佢係你個仔，你有責任幫手照顧佢，而你女朋友需要學識接受。

[匿名]

其實小朋友讀小學已經好懂性，亦有感受，佢內心都會唔開心自己好似不受歡迎，呢個係你親生仔，你有無花時間試下同佢傾下佢感受，或佢想點？

[匿名]

點會叫自己個仔/女做「小朋友」，佢唔係你生架咩，有事就洗曬手咁

[匿名]

個小朋友你有份！講完

[匿名]

首先，其實你要處理既係
你同你女朋友依家都覺得個小朋友係外人咁
但從來都唔應該係同小朋友既關係變做對立
我諗你女朋友最嬲唔係因為小朋友
而係佢覺得你都冇出過聲
有時放假可能只係想同你一齊
而你既感覺俾佢就係我都唔想架
唯有硬食
咁有冇試過再同小朋友媽媽溝通一下？
一日半假總得掛
其實個女仔同得你一齊就要接受呢樣
唔係講風涼說話
或者諗下有咩方法可以令女朋友覺得有小朋友一齊都開心d 呢個係你做老豆既責任

[匿名]

點解一齊咗四年依家先話有問題？即係你女朋友之前一直都扮冇問題？小朋友係無辜 佢冇得揀 有冇諗過佢感受？ 如果你女朋友係愛你嘅話 係咪都應該企係你角度諗吓？
如果佢係都要逼你揀嘅話，你自己咁大個應該識諗