求咗婚三年都冇講過幾時註冊

[匿名]

我地都係20中，拍左拖都有9年就嚟10年，感謝一直都好穩定。大家都出左嚟做野都有幾年，我嘅收入好穩定，亦都有能力生小朋友同俾到足夠嘅資源俾小朋友，係未婚夫同我求婚後屋企人送左個單位俾我同未婚夫同居，所以住屋問題都唔洗擔心；而未婚夫工作唔係太穩定，有時有工返有時冇工返，冇工返嘅日子就日日喺屋企，咩都唔做就喺屋企攤足全日

前3年未婚夫已經同我求左婚亦都應承左，當時地都好想好想結婚，婚禮都係從簡，簡簡單單食餐飯就可以。同居後，佢一開始係好積極去諗將來，會一齊分擔家務，但係一齊住嘅1年幾後佢就三分鐘熱度。工又返少左，家務又唔做，我日日放工就見到佢攤係個梳化到

我開始覺得自己已經冇咁愛佢，我已經冇左想同佢結婚嘅嗰種心態，同佢嘅距離好似越嚟越遠。我有同佢傾過，想佢返多啲工炒下散都好，至少對個家有少少付出，但佢又唔想。想佢唔洗返工嘅時候幫手做下啲家務，衫已經係一個星期洗一次都唔做。同埋，求婚咁耐佢都冇話幾時去註冊，我有問佢想幾時，佢又話下年、再下年…

係最近依一年，我已經唔想同依個人將就落去。我講過自己嘅諗法，佢又唔擺係心上。但係有時我會諗，如果宜家先嚟悔婚，佢、屋企人、朋友會點諗我？或者有咩方法可以令到自己重新愛上佢繼續結婚，其實一齊左咁多年，我都唔想咁易放棄，好想再愛佢一次，俾次機會大家

[匿名]

解決咗住屋最大嘅支出，女朋友又有穩定收入足夠支持其他開支，佢宜家同居已經享受哂呢啲福利（軟飯），洗乜咁煩結婚喎～

[匿名]

你越黎越反感，係因為你自己心入面其實知道：
你地住緊層樓係你屋企人俾，其實佢同食軟飯冇咩分別。
·
以你屋企同自身既條件，大可以搵一個更上進更有能力既男人。
只係一齊左咁多年，你冇勇氣重新開始搵新人姐。
—————————
可惜人係好犯賤，當一樣嘢唔需要付出努力就可以得到，就好自然會開始懶。
·
佢斷定你唔會離開、你收入穩定自帶房產，佢有咩理由努力？根本唔需要。
———————————————
同居可以睇到一個人既真實面貌，所以婚前試下一齊住、近距離相處過，係好事。
·
婚前係咩樣，婚後只會一樣或者更差。
千祈唔好期待婚後佢會突然變好，呢個可能性低到同新冠突然消失差唔多。
·
20中你仲有得揀，唸清楚依家既相處模式你可唔可以頂到一世。
·
你永遠冇辦法改變另一個人，婚姻亦唔應該其中一方無止境向後退黎遷就。
·
當你講得出「將就」兩個字，就證明呢段關係只係喺度垂死掙扎。
·
你既然有計劃生小朋友，你真係想呢個人做你小朋友既爸爸？

[匿名]

條友似係想有屋住咋wor….
你請個工人返黎做吓家務冇咁嬲

[匿名]

食軟飯唔係問題啊，但佢食到成個廢人咁令你反感，無論係財力、家務或情緒價值都無法提供，你真係想養廢柴一世？你確定佢可以成為一個好爸爸？

[匿名]

不如開心見誠同對方傾吓，講吓自己唔開心嘅位，感情係兩個人嘅事，自己一個人係解決唔到

[匿名]

婚姻大事絕對唔可以將就🙅🏻‍♀️🙅🏻‍♀️🙅🏻‍♀️，加上呢個男人都無上進心，有得走就好快d走。

[匿名]

如果我係你屋企人同朋友，我會好贊成你離開不上進又對你不上心既另一半🙌

[匿名]

好簡單。呢個人會係你將來孩子的爸。你的孩子會被他教育。長大會像他。如果你想到呢個位你都覺得可以合理化，咁你地結婚啦。

[匿名]

其實真係無嘢啵
連最基本付出少少洗3呢d都做唔到
食軟飯喔😂

[匿名]

甘如果他一直唔肯改變，你都唔想放棄？有時拍拖多年未必一定會開花結果架，ps一句，人地點諗你，係人地即事，關你鬼事咩😂

[匿名]

不將就！人生係自己😢點解要諗人而委屈自己？攤開傾多一次，佢都唔變都冇辦法了😢唔好俾所謂嘅時間束縛自己🥺

[匿名]

要對住呢男人一世嘅係你，而唔係佢、屋企人同朋友🤷🏻‍♀️

當有日你同呢個男人結埋婚生埋仔，佢不事生產日日攤係度仔又唔揍。你放工返屋企仲要煮飯洗衫做家務照顧小朋友仲要俾埋錢佢買嘢食，攰到隻狗咁。佢、屋企人、朋友對你嘅睇法可以幫到你啲乜？？

[匿名]

在乎其他人點睇係最愚蠢嘅事，自己嘅幸福先係最重要，唔覺得男方會再次變得積極，因為依加一切都太舒服

[匿名]

你自己都講得出已經唔係好想同佢結，佢亦敷衍你下年又再下年，即係佢應該都唔係好想結🙈既然係咁不如唔好夾硬結……講真結咗都怕你後悔🙈

[匿名]

如果真係決定結婚，大約係時候開始諗離婚了🙈🙈